MIRI: Parti Islam Malaysia (PAS) Miri minta perintah berundingka chara malas pengangkun pengajar setipak enggau tanggung pengawa sida ke ngiri pemandai sereta ngemansangka pengawa pelajar menua tu.

PAS minta perintah berundingka sekeda pekara kena malas budi raban pengajar ti udah ngangkatka tikas pemandai ba menua tu beserimbai enggau Hari Pengajar taun tu.
Parti tu, ba siti penerang minta perengka guna enggau rumah pengajar ba sekula menua pesisir patut diangkatka manah agi. Kelimpah ari nya, Opis Menteri Pelajar Malaysia patut ngeamatka semaya ti deka ngelatih bala pengajar ke diambi ngarau ngajar ba sekula sekondari nampung pengawa sida.

“Kitai ngarapka raban ti megai tanggung pengawa tu beratika penanggul ti nuntung bala pengajar nya ngambika sida nyamai gawa lalu ngajar bala nembiak enggau naka ulih,” ku penerang nya.Penerang nya mega, madahka pengajar besai amat tanggung pengawa kelebih agi ba dunya kemaya hari tu ti majak tegap sereta mar.

“Batang pengawa pengajar ukai semina ngajar, ngiring, ngasuh, ngelatih sereta beratika nembiak ti diajar sida iya aja, tang bungkur pengawa pengajar diatu majak besai,” ku penerang nya.

Beduduk ari nya, perintah patut meri terima kasih ngagai bala pengajar ti udah ngajar nembiak ba kandang mengeri enggau menua pesisir ngambika tau nyadi serak pemansang ngagai menua tu jemah ila.Ba penerang nya mega, PAS Miri ngenataika selamat ngintu Hari Pengajar ngagai semua pengajar ba serata menua Malaysia ti diintu sehari tu (hari Satu).

theborneopost.com